Thin Zar Latt 日本語勉強しよう

မင်္ဂလာပါ။

ဂျပန်စာလေ့လာရအောင် ပေ့ဂျ်မှ သဥ္ဇာလတ် (Thin Zar Latt) ပါ။

သိပြီးသားသူတွေလည်း ရှိသလို၊ မသိသေးတဲ့သူတွေလည်း အများကြီးရှိမယ်ထင်လို့ ကိုယ့်အကြောင်းလေ:ကို မိတ်ဆက်ခွင့်ပြုပါနော်။

၂၀၀၄လောက်မှာ ခရီးသွားကုမ္ပဏီမှာ အလုပ်လုပ်ခဲ့ပါတယ်။ အဲဒီ့အလုပ်လုပ်နေစဉ်မှာပဲ ဂျပန်စာကို စတင်လေ့လာဖို့ အကြောင်းဖန်လာခဲ့ပြီး၊ 2005 ခုနှစ်မှာ Win Japanese Language School မှာ ရုံးဝန်ထမ်းအဖြစ် ပြောင်းရွှေ့အလုပ်လုပ်ခဲ့ပါတယ်။ အဲဒီအချိန်ကစပြီး ဂျပန်စာသင်ကြားရေးကို ပိုပြီး စိတ်ဝင်စားလာခဲ့တာပါ။

အလုပ်ပြီးတဲ့အချိန်တွေမှာ ဂျပန်စာကို အိမ်တွေလိုက်သင်ပေးရင်း၊
“တစ်နေ့ကျ ဂျပန်မှာ ကျောင်းတက်ပြီး ဂျပန်စာကို သေချာသင်ကြားနိုင်တဲ့ ဆရာမတစ်ယောက် ဖြစ်ချင်တယ်” ဆိုတဲ့ အိပ်မက်တစ်ခု မွေးဖွားလာခဲ့ပါတယ်။ အခုအချိန်မှာတော့ အဲဒီ့အိပ်မက်ကို တကယ် လက်တွေ့အကောင်အထည်ဖော်နိုင်ခဲ့တာကို ကျွန်မအတွက် အရမ်းတန်ဖိုးရှိတဲ့အရာတစ်ခုလို့ ခံစားရပါတယ်။

2009 ခုနှစ်မှာ ဂျပန် Language School ကို စတက်ခဲ့ပြီး၊ အဲဒီအချိန်မှာ N2 အောင်ထားပြီး N1 အဆင့်ရှိနေပြီ ဖြစ်တာကြောင့် တစ်နှစ်တည်းနဲ့ ကျောင်းပြီး တက္ကသိုလ်တက်ခွင့် ရခဲ့ပါတယ်။ ဂျပန်ရောက်ခါစတုန်းက အတွေ့အကြုံသိပ်မရှိသေးလို့ ဘယ်မေဂျာကိုရွေးရမလဲ ဗဟုသုတနည်ကးခဲ့တာကြောင့် ကလေးလဲ ချစ်တတ်တာမို့ ပညာရေးနဲ့နီးစပ်တဲ့ဘာသာရပ်ကို လေ့လာချင်တာရယ်ကြောင့် Childcare Major ကို ရွေးချယ်ခဲ့ပါတယ်။

တက္ကသိုလ် ဒုတိယနှစ်ကစပြီး နောက်ဆုံးနှစ်အထိ စကော်လာရှစ် နဲ့ ကျောင်းတက်ခဲ့ရပါတယ်။ ဘွဲ့ရပြီးတဲ့နောက် ကလေးထိန်းကျောင်း မှာ အလုပ်ဝင်လုပ်ခဲ့ပေမယ့်၊ လစာနည်းတာ၊ ကျန်ခဲ့တဲ့မိသားစုကို ထောက်ပံ့ဖို့ မလုံလောက်တာ၊ အလုပ်ဖိအားများတာတွေကြောင့် ၃ လလောက်နဲ့ အလုပ်ထွက်ခဲ့ပါတယ်။

အဲဒီနောက် ကုန်တိုက်တစ်ခုက ချော့ကလက်ဆိုင်မှာ မန်နေဂျာအဖြစ် ၅ နှစ် လုပ်ခဲ့ပါတယ်။ အဲဒီအချိန်တွေမှာလည်း “ဂျပန်စာသင်တဲ့ဆရာမ ဖြစ်ချင်တယ်” ဆိုတဲ့ အိပ်မက်ကို မမေ့ခဲ့ပါဘူး။ ဒါပေမယ့် ငွေရေးကြေးရေးအခြေအနေကြောင့် ချက်ချင်းအကောင်အထည်မဖော်နိုင်သေးခဲ့တာပါ။

2018 ခုနှစ်မှာတော့ အွန်လိုင်းကနေတဆင့် ဂျပန်စာလောကထဲ ပြန်လည်ဝင်ရောက်နိုင်ခဲ့ပါတယ်။
ချော့ကလက်ဆိုင်အလုပ်ကို ထွက်ပြီး ဂျပန်စာသင်ကြားရေးလောကထဲ အပြည့်အဝဝင်ရောက်မယ့်အချိန်မှာ၊ “သင်ကြားနိုင်စွမ်းရှိတဲ့ ဆရာတစ်ယောက်အဖြစ် ရပ်တည်နိုင်ဖို့” လိုအပ်တဲ့ အရည်အချင်းကို ပြည့်စုံစေချင်တာကြောင့် ဂျပန်စာဆရာအတတ်သင်ကျောင်းကို တစ်နှစ်ပြန်တက်ခဲ့ပါတယ်။

အဲဒီလို လိုအပ်တဲ့ အရည်အချင်းတွေကို ဖြည့်ဆည်းပြီးနောက်မှာတော့၊ အခုအချိန်ထိ ဂျပန်စာသင်ကြားရေး ဆရာမအဖြစ် ရပ်တည်နေပါတယ်။

ကျွန်မအတွက် ဂျပန်စာသင်ကြားရေးဟာ အလုပ်တစ်ခုတင်မကဘဲ အိပ်မက်တစ်ခု၊ တာဝန်တစ်ခု၊ နဲ့ မျှဝေပေးချင်တဲ့ အရာတစ်ခု လည်း ဖြစ်ပါတယ်။
ကျွန်မ သင်ကြားပေးနေတဲ့အရာတွေကနေ ဂျပန်စာလေ့လာနေတဲ့သူတစ်ယောက်ယောက်အတွက် အထောက်အကူဖြစ်စေမယ်၊ ရှေ့ဆက်လှမ်းဖို့ အားတစ်ခုဖြစ်စေမယ်ဆိုရင် အဲဒါက ကျွန်မအတွက် အကြီးမားဆုံး ဝမ်းသာမှုပါပဲ။

နောက်လည်း ဒီပေ့ဂျ်ကနေ ဂျပန်စာလေ့လာနေသူတွေ အတွက် အသုံးဝင်တဲ့အရာတွေကို ဆက်လက်မျှဝေပေးသွားပါမယ်နော်။
အားပေးကြတဲ့သူတိုင်းကို ကျေးဇူးအများကြီးတင်ပါတယ်ရှင်။